Erasmus+ жобаларының қоршаған ортаны қорғау және табиғи ресурстарды басқару саласындағы жоғары білімге әсері бойынша кластерлік кездесу

2025 жылдың 9 желтоқсанында Қазақстандағы Erasmus+ ұлттық офисі (бұдан әрі – NEO KZ) Астана қаласында, Есіл университеті алаңында Erasmus+ жобаларының қоршаған ортаны қорғау және табиғи ресурстарды басқару саласындағы жоғары білімге әсері бойынша кластерлік кездесу ұйымдастырды.

Іс-шараның мақсаты – аяқталған және жалғасып жатқан жобалардың нәтижелерін, жетістіктерін тарату; жобалардың жеке, институционалдық және ұлттық деңгейдегі әсерін бағалау; жобалар арасындағы синергияны күшейту және әріптестік желілерін дамыту, сондай-ақ болашақ жобаларға арналған ұсынымдар әзірлеу болды. Кездесу офлайн және онлайн форматта өтті.

Қатысушыларды Есіл университетінің Ғылыми жұмыс және интернационалдандыру жөніндегі проректор Даметкен Торекулова қарсы алды. NEO KZ үйлестірушісі Лаура Палуанова Erasmus+ бағдарламасы және 2025 жылғы конкурстың нәтижелері туралы ақпарат ұсынды. Одан кейін ЖБӘА жобаларының үйлестірушілері (ESGCA, UnWaste, EMINReM, LESLIE, SAGRIS, GDCAU, GreenCA) өз жобаларының нәтижелері мен олардың түрлі деңгейлердегі әсерін таныстырды. Кездесуге жүзеге асып жатқан жобалармен қатар аяқталған және жаңадан басталған жобалар да қатысты. Сұрақ-жауап сессияларында қатысушылар спикерлерге сұрақтар қойып, тиісті жауап алды. Іс-шара соңында қатысушылар Erasmus+ жобаларының әсерін арттыру бойынша маңызды ұсынымдар берді.

Жалпы қатысушылар саны – 103 адам болды (оффлайн – 24, онлайн – 79). Олар Қазақстанның 11 қаласынан және 34 жоғары оқу орнынан қатысты.

Іс-шараның негізгі нәтижелері:

• Erasmus+ бағдарламасының экологиялық білім беруге қосқан үлесін бірлесіп түсіну: Кездесу Erasmus+ жобаларының оқыту сапасын, білім беру бағдарламаларының өзектілігін және институционалдық әлеуетті қалай арттырғанын бірлесіп, дәлелді түрде түсінуге мүмкіндік берді. Бұл бағдарлама ұлттық және өңірлік басымдықтар үшін стратегиялық маңызға ие екенін көрсетті.
• Университеттер мен мүдделі тараптар желісін күшейту: Негізгі жетістіктердің бірі – университеттер, жоба үйлестірушілері және сыртқы серіктестер арасындағы ынтымақтастықты кеңейту және тереңдету болды. Қатысушылар жаңа кәсіби байланыстар орнатып, қолданыстағы серіктестіктерді нығайтты, бұл болашақ бастамаларға берік негіз қалайды.
• Үздік тәжірибелер мен ауқымды инновацияларды анықтау: Кездесу жобалардың табысты нәтижелерін, оқытудың инновациялық модельдерін, цифрлық құралдарды және пәнаралық тәсілдерді таныстыруға мүмкіндік берді. Бұл үздік тәжірибелер басқа жоғары оқу орындарына таратуға болатын тиімді шешімдер ретінде танылды.
• Жобаларды әзірлеу, басқару және тұрақтылық бойынша әлеуетті арттыру: Презентациялар, пікірталастар және тәжірибе алмасу арқылы қатысушылар Erasmus+ жобаларына жоғары сапалы өтінімдер дайындау, ағымдағы жобаларды басқару және нәтижелердің тұрақтылығын қамтамасыз ету дағдыларын күшейтті. Кездесу болашақ бастамалардың тиімділігін арттыруға нақты ұсыныстар берді.
• Болашақ бағыттарды айқындау: Маңызды нәтижелердің бірі – жаңа жобаларға арналған басым бағыттарды анықтау, соның ішінде су ресурстарын басқару, климаттық төзімділік, биоәртүрлілікті сақтау және жасыл технологиялар. Қатысушылар тұрақты үйлестірудің, тақырыптық жұмыс топтарының және жобалар арасындағы синергия механизмдерінің маңызын да атап өтті.

Іс-шара материалдары NEO KZ сайтында қолжетімді: Ресурстар-Презентациялар бөлімі.

Іс-шара жазбасы NEO KZ сайтында қолжетімді: Іс-шаралар-Видеогалерея бөлімі.